నామినేషన్ కేంద్రం వద్ద పటిష్ట పోలీసు బందోబస్తు!
100 మీటర్ల పరిధిలో ట్రాఫిక్ ఆంక్షలు.. అభ్యర్థితో పాటు ఇద్దరికే అనుమతి
నంద్యాల సబ్ డివిజన్ ఏఎస్పీ సుస్మిత
నంద్యాల క్రైమ్, అక్టోబర్ 16, (సీమకిరణం న్యూస్) :
నంద్యాల మున్సిపాలిటీ ఎన్నికల నామినేషన్ల ప్రక్రియ ప్రారంభమైన నేపథ్యంలో పోలీసు శాఖ పటిష్ట భద్రతా ఏర్పాట్లు చేపట్టింది. నామినేషన్ల స్వీకరణ ప్రశాంతంగా, పారదర్శకంగా జరిగేలా ప్రత్యేక చర్యలు తీసుకున్నట్లు నంద్యాల సబ్ డివిజన్ ఏఎస్పీ సుస్మిత తెలిపారు. నంద్యాల మున్సిపాలిటీ పరిధిలోని 52 వార్డులకు సంబంధించి అక్టోబర్ 16, 17, 18 తేదీల్లో నామినేషన్ల స్వీకరణ చేపట్టనున్నారు. ప్రతిరోజూ ఉదయం 11 గంటల నుంచి మధ్యాహ్నం 3 గంటల వరకు మాత్రమే నామినేషన్లు స్వీకరిస్తారు. అభ్యర్థులు నిర్ణీత సమయానికి తమ నామినేషన్లను సమర్పించాలని అధికారులు సూచించారు. అభ్యర్థులకు ఇబ్బందులు కలగకుండా నామినేషన్ కేంద్రంలో ప్రత్యేక హెల్ప్‌డెస్క్ ఏర్పాటు చేశారు. వార్డుల వారీగా గదుల వివరాలను తెలియజేసే సూచిక బోర్డులను సైతం అందుబాటులో ఉంచారు. దీంతో అభ్యర్థులు తమకు కేటాయించిన గదులను గుర్తించి నామినేషన్ ప్రక్రియను సులభంగా పూర్తి చేసుకోవచ్చు. భద్రతా చర్యల్లో భాగంగా నామినేషన్ కేంద్రం చుట్టూ 100 మీటర్ల పరిధిలో ట్రాఫిక్ మళ్లింపు చర్యలు చేపట్టారు. నామినేషన్ దాఖలు చేసే అభ్యర్థితో పాటు మరో ఇద్దరు వ్యక్తులకు మాత్రమే కేంద్రంలోకి ప్రవేశం కల్పిస్తారు. ఒక్కో నామినేషన్‌కు మొత్తం ముగ్గురికి మాత్రమే అనుమతి ఉంటుంది. ఎన్నికల ప్రక్రియలో ఎలాంటి అవాంఛనీయ ఘటనలు చోటుచేసుకోకుండా పోలీసు సిబ్బందిని అప్రమత్తం చేశారు. అభ్యర్థులు, రాజకీయ పార్టీల ప్రతినిధులు ఎన్నికల నిబంధనలను తప్పనిసరిగా పాటించాలని, పోలీసు శాఖకు సహకరించి నామినేషన్ల ప్రక్రియ ప్రశాంతంగా జరిగేలా చూడాలని ఏఎస్పీ సుస్మిత సూచించారు.
