సెల్ ఫోన్ స్నాచింగ్ నిందితుడి అరెస్ట్
పరారీలో ఉన్న నేరగాడు పట్టివేత నగదు స్వాధీనం
నిందితుడిపై గతంలోనూ పలు కేసులు
డిసిపి జి. చంద్ర మోహన్ వెల్లడి
హైదరాబాద్, ఫిబ్రవరి 12, (సీమకిరణం న్యూస్):
కుల్సుంపురా పోలీస్ స్టేషన్ పరిధిలో సెల్ ఫోన్ స్నాచింగ్కు పాల్పడి, గత కొంతకాలంగా తప్పించుకు తిరుగుతున్న నిందితుడిని పోలీసులు ఎట్టకేలకు అరెస్ట్ చేశారు. నిందితుడి నుండి నగదును స్వాధీనం చేసుకున్నట్లు గోల్కొండ జోన్ డిసిపి జి. చంద్ర మోహన్ ఒక ప్రకటనలో తెలిపారు. నిందితుడి వివరాలు: అరెస్టయిన నిందితుడు భవానీ నగర్కు చెందిన సయ్యద్ ఫక్రూ అలియాస్ అర్బాజ్ (23). ఇతను బహదూర్పురాలోని ఒక పాత టైర్ల షాపులో పనిచేస్తుంటాడు. ఇతనిపై గతంలో భవానీ నగర్ పోలీస్ స్టేషన్లో హత్యాయత్నం మరియు ఆయుధాల చట్టం కింద కేసులు నమోదై ఉన్నాయి.
కేసు వివరాలు :
గత ఏడాది డిసెంబర్ 16న, ఫిర్యాదుదారుడు తన స్నేహితులతో కలిసి జియాగూడలోని పీలా మండపం వద్ద మాట్లాడుకుంటుండగా, నిందితుడు అర్బాజ్ తన స్నేహితుడు ఇంతియాజ్తో కలిసి హోండా యాక్టివాపై అక్కడకు చేరుకున్నాడు. వీరితో పాటు మరో ఇద్దరు సహచరులు హాజీ, కలీమ్ కూడా ఉన్నారు. ఫోన్ వాడుతున్న బాధితుడిని గమనించిన నిందితులు, వేగంగా వాహనాన్ని దగ్గరకు తీసుకెళ్లి చేతిలోని ఫోన్ను లాక్కొని పరారయ్యారు. అనంతరం ఆ ఫోన్ను విక్రయించగా వచ్చిన డబ్బులో అర్బాజ్ తన వాటాగా రూ. 2,500 తీసుకున్నాడు. పోలీసుల దర్యాప్తు:ఈ కేసులో ఇప్పటికే మొహమ్మద్ ఇంతియాజ్ @ షూటర్, షేక్ హాజీలు జైలులో ఉండగా, పరారీలో ఉన్న అర్బాజ్ను క్రైమ్ టీమ్ నిన్న పట్టుకుంది. నిందితుడి వద్ద నుండి రూ. 2,000 నగదును పోలీసులు స్వాధీనం చేసుకున్నారు. మరో నిందితుడు కలీమ్ కోసం పోలీసులు గాలిస్తున్నారు. కేసును ఛేదించి నిందితుడిని అరెస్ట్ చేసిన కుల్సుంపురా ఇన్ స్పెక్టర్ ఎ. రాములు, డిటెక్టివ్ ఇన్ స్పెక్టర్ డి. నాగార్జున మరియు క్రైమ్ టీమ్ సభ్యులను డిసిపి అభినందించారు. ఈ ఆపరేషన్ అడిషనల్ డిసిపి కృష్ణ గౌడ్ మరియు గోషామహల్ ఏసిపి సుదర్శన్ గారి పర్యవేక్షణలో నిర్వహించబడింది.
