💥ఆయుష్షు పెరగాలంటే ప్రోటీన్ తగ్గించాలా? తాజా పరిశోధనలో కీలక విషయాలు
@-ఆరోగ్యం, ఆయుష్షుపై ప్రోటీన్ నియంత్రణ ప్రభావంపై కీలక అధ్యయనం
@-మితమైన ప్రోటీన్ జీవక్రియను మెరుగుపర్చి వృద్ధాప్యాన్ని నెమ్మదిస్తుందని వెల్లడి
@-శరీర శ్రమ తక్కువగా ఉన్నవారికి ఈ విధానం ఎక్కువ మేలు చేస్తుందని సూచన
@-క్రీడాకారులు, వృద్ధులకు మాత్రం అధిక ప్రోటీన్ అవసరమని స్పష్టం
@-ప్రోటీన్ విషయంలో వ్యక్తిగత అవసరాలను బట్టి నిర్ణయం తీసుకోవాలని సలహా
ఆరోగ్యంగా, ఎక్కువ కాలం జీవించాలని అందరూ కోరుకుంటారు. ఇందుకోసం మంచి ఆహారం తీసుకోవడం చాలా ముఖ్యం. ముఖ్యంగా ప్రోటీన్ శరీరానికి అత్యవసరమని, కండరాల నిర్మాణానికి కీలకమని మనందరికీ తెలుసు. అయితే, అవసరానికి మించి ప్రోటీన్ తీసుకోవడం అందరికీ మంచిది కాదని, ముఖ్యంగా శారీరక శ్రమ తక్కువగా ఉన్నవారిలో ఇది జీవక్రియ ఆరోగ్యంపై ప్రతికూల ప్రభావం చూపవచ్చని ఒక కొత్త శాస్త్రీయ సమీక్ష వెల్లడించింది. అమెరికాలోని విస్కాన్సిన్-మాడిసన్ విశ్వవిద్యాలయానికి చెందిన పరిశోధకులు బెయిలీ ఎ. నాఫ్, డడ్లీ డబ్ల్యూ. లామింగ్ 350కి పైగా అధ్యయనాలను విశ్లేషించి ఈ నిర్ధారణకు వచ్చారు. వీరి పరిశోధనా పత్రం ‘సెల్ ప్రెస్ బ్లూ’ అనే ప్రముఖ సైన్స్ జర్నల్లో ప్రచురితమైంది. దీని ప్రకారం, ప్రోటీన్ను పూర్తిగా మానేయడం కాకుండా, మితంగా తగ్గించడం వల్ల అనేక ఆరోగ్య ప్రయోజనాలు కలుగుతాయని తేలింది. ముఖ్యంగా జీవక్రియ ఆరోగ్యం మెరుగుపడటంతో పాటు, జీవసంబంధ వృద్ధాప్య ప్రక్రియ నెమ్మదిస్తుందని ఈ అధ్యయనం స్పష్టం చేసింది.
పరిశోధనలో ఏం తేలింది?
మితమైన ప్రోటీన్ నియంత్రణ వల్ల శరీరంలోని కణాలపై ఒత్తిడి తగ్గుతుందని, పోషకాలను గ్రహించే విధానం మెరుగుపడుతుందని పరిశోధకులు కనుగొన్నారు. దీనివల్ల వయసుతో పాటు వచ్చే అనేక వ్యాధుల ముప్పు తగ్గుతుంది. కేలరీలను తగ్గించడం వల్ల ఆయుష్షు పెరుగుతుందని గతంలో అనేక అధ్యయనాలు చెప్పినప్పటికీ, చాలా మందికి దాన్ని ఆచరించడం కష్టంగా ఉంటుంది. అయితే, ప్రోటీన్ను మితంగా తీసుకోవడం అనేది మరింత ఆచరణీయమైన మార్గమని నిపుణులు అభిప్రాయపడుతున్నారు. మితమైన ప్రోటీన్ నియంత్రణ వల్ల శరీరంలోని కణాలపై ఒత్తిడి తగ్గుతుందని, పోషకాలను గ్రహించే విధానం మెరుగుపడుతుందని పరిశోధకులు కనుగొన్నారు. దీనివల్ల వయసుతో పాటు వచ్చే అనేక వ్యాధుల ముప్పు తగ్గుతుంది. కేలరీలను తగ్గించడం వల్ల ఆయుష్షు పెరుగుతుందని గతంలో అనేక అధ్యయనాలు చెప్పినప్పటికీ, చాలా మందికి దాన్ని ఆచరించడం కష్టంగా ఉంటుంది. అయితే, ప్రోటీన్ను మితంగా తీసుకోవడం అనేది మరింత ఆచరణీయమైన మార్గమని నిపుణులు అభిప్రాయపడుతున్నారు. ప్రోటీన్లో ఉండే ఐసోలూసిన్, వాలైన్ వంటి కొన్ని అమైనో ఆమ్లాలను ఎక్కువగా తీసుకున్నప్పుడు, అవి శరీరంలో వృద్ధాప్యాన్ని వేగవంతం చేసే మార్గాలను ప్రేరేపిస్తాయి. వీటిని నియంత్రించడం వల్ల ప్రోటీన్ మొత్తాన్ని తగ్గించినప్పుడు కలిగే ప్రయోజనాలే కలుగుతాయని తేలింది. ప్రోటీన్ తక్కువగా తీసుకున్నప్పుడు శరీరంలో FGF21 అనే హార్మోన్ స్థాయిలు పెరుగుతాయి. ఈ హార్మోన్ శక్తి వినియోగాన్ని పెంచడం, రక్తంలో చక్కెర స్థాయిలను నియంత్రించడం, వాపును తగ్గించడం వంటి పనుల ద్వారా జీవక్రియను మెరుగుపరుస్తుందని జంతువులపై చేసిన ప్రయోగాల్లో తేలింది.
ఎవరు జాగ్రత్తగా ఉండాలి..?
అయితే, ప్రోటీన్ నియంత్రణ అనేది అందరికీ వర్తించదని పరిశోధకులు స్పష్టం చేశారు. ప్రోటీన్ అవసరాలు వ్యక్తి వయసు, శారీరక శ్రమ, ఆరోగ్య పరిస్థితిపై ఆధారపడి ఉంటాయి. వ్యాయామం చేసేవారు, క్రీడాకారులకు కండరాల మరమ్మతు, పెరుగుదలకు అధిక ప్రోటీన్ అవసరం. అలాగే, గర్భిణులు, వృద్ధులు, కండరాల క్షీణత (సార్కోపీనియా) సమస్య ఉన్నవారు కూడా వైద్యుల సూచన మేరకు ఎక్కువ ప్రోటీన్ తీసుకోవాలి. ఆధునిక సమాజంలో ఎక్కువ మంది శారీరక శ్రమకు దూరంగా ఉంటున్నారని, వీరు తమకు అవసరమైన దానికంటే ఎక్కువ ప్రోటీన్ను తీసుకుంటున్నారని పరిశోధకులు ఆందోళన వ్యక్తం చేశారు. “ప్రోటీన్ ఎక్కువ తీసుకుంటే మంచిది” అనే ప్రచారాన్ని గుడ్డిగా నమ్మవద్దని, వయసు, శ్రమ స్థాయిని బట్టి వ్యక్తిగత అవసరాలకు అనుగుణంగా పోషకాహార నిపుణుల సలహాతో నిర్ణయం తీసుకోవాలని సూచించారు. మొత్తం మీద, ప్రోటీన్ శరీరానికి తప్పనిసరి అయినా, “అతి సర్వత్ర వర్జయేత్” అన్నట్లుగా దానిని మితంగా తీసుకోవడమే ఆరోగ్యానికి శ్రేయస్కరమని ఈ అధ్యయనం సారాంశం.
