Sunday, November 22, 2026
ads
📄 ePaper
Homeఆంధ్రప్రదేశ్ఊరి అభివృద్ధే అజెండా.. ప్రజాసేవే లక్ష్యం!

ఊరి అభివృద్ధే అజెండా.. ప్రజాసేవే లక్ష్యం!

📰 Generate e-Paper Clip

ఊరి అభివృద్ధే అజెండా.. ప్రజాసేవే లక్ష్యం!

 

అధికారం లేకున్నా అభివృద్ధి బాటలో అడుగులు.. నాలుగు గ్రామాల ప్రగతికి కోట్లలో చేయూత!

 

నిరుద్యోగ యువతకు ఉద్యోగాలు.. పేద విద్యార్థులకు ల్యాప్‌టాప్‌లు

 

ఆలయాలు, తాగునీరు, వ్యవసాయ రహదారులకు ఆర్థిక సహకారం

 

ప్రజల మధ్య ఉంటూ.. పల్లెల ప్రగతికి బాటలు వేస్తున్న బొమ్మన మధుమోహన్ రెడ్డి

 

కర్నూలు ప్రతినిధి నవంబర్ 18 (సీమకిరణం న్యూస్) :

పదవి ఉంటేనే ప్రజలకు సేవ చేయాలా..? అధికారం ఉంటేనే అభివృద్ధి పనులు చేపట్టాలా..? అన్న ఆలోచనలకు భిన్నంగా సాగుతున్నారు బొమ్మన మధుమోహన్ రెడ్డి. తాను సంపాదించిన దాంట్లో కొంత భాగాన్ని పుట్టిన ఊరితోపాటు చుట్టుపక్కల గ్రామాల అభివృద్ధికి వెచ్చిస్తూ ప్రజల మన్ననలు పొందుతున్నారు. స్వగ్రామం ఉప్పలపాడుతో పాటు ఉయ్యాలవాడ, ఎన్.కొంతలపాడు, బుక్కాపురం గ్రామాల అభ్యున్నతికి తనవంతు సహకారం అందిస్తున్నారు. రాజకీయ నాయకుడి తరహాలో ప్రజల సమస్యలపై స్పందిస్తూ, అభివృద్ధి కార్యక్రమాలకు ఆర్థికంగా అండగా నిలుస్తున్నారు. మాటలకే పరిమితం కాకుండా చేతల్లో సేవను చూపిస్తున్నారు.

 

నాలుగు గ్రామాల అభివృద్ధికి 5 కోట్ల చేయూత!

 

గ్రామాల్లో తాగునీటి సమస్య పరిష్కారం నుంచి ఆలయాల అభివృద్ధి వరకు అనేక కార్యక్రమాలకు శ్రీకారం చుట్టారు. ఉప్పలపాడులో కర్రెమ్మ, మారెమ్మ, సుంకులమ్మ ఆలయాల నిర్మాణానికి రూ.7 లక్షలు ఖర్చు చేశారు. ఉయ్యాలవాడలో రూ.6 లక్షలతో మినరల్ వాటర్ ప్లాంట్ ఏర్పాటు చేశారు. కొండపై వెలసిన వెంకటేశ్వరస్వామి ఆలయ ప్రాంగణంలో బోరు, మోటారు ఏర్పాటు చేయించారు. వాల్మీకి ఆలయ విగ్రహ ప్రతిష్ఠ, అభివృద్ధి పనులకు రూ.5 లక్షలతో భూమిపూజ చేశారు. ఉప్పలపాడులో దర్గా నిర్మాణానికి రూ.6 లక్షలు అందించారు.

 

యువత భవిష్యత్తుకు భరోసా.. ఉద్యోగాల కల్పనకు కృషి!

 

గ్రామీణ ప్రాంతాల్లో ఉన్నత చదువులు చదివినా ఉద్యోగాలు లేక ఇబ్బందులు పడుతున్న యువతకు అండగా నిలుస్తున్నారు. పేద కుటుంబాలకు చెందిన ఇంజినీరింగ్, డిగ్రీ, పీజీ విద్యార్థులకు ల్యాప్‌టాప్‌లు అందించి విద్యాభివృద్ధికి తోడ్పడ్డారు. విప్రో, ట్యాబ్, జెమిని, ఇన్ఫోసిస్ వంటి సంస్థల్లో యువతకు ఉద్యోగ అవకాశాలు కల్పించేందుకు సహకరించారు. యువతకు ఉపాధి లభిస్తే కుటుంబాల ఆర్థిక పరిస్థితి మెరుగుపడుతుందనే లక్ష్యంతో ఈ కార్యక్రమాలు చేపడుతున్నారు.

 

రైతుల బాటకు రహదారులు.. పేదల ఇంటికి ఆర్థిక సాయం!

 

రైతులు తమ పొలాలకు వెళ్లేందుకు ఇబ్బందులు పడకూడదనే ఉద్దేశంతో వ్యవసాయ రహదారుల నిర్మాణానికి సహకరిస్తున్నారు. ఎన్.కొంతలపాడు గ్రామంలో గోశాల భవనాల నిర్మాణానికి రూ.10 లక్షలతో పనులు ప్రారంభించారు. పేద కుటుంబాల్లో వివాహాలకు ఆర్థిక సహాయం అందిస్తున్నారు. వివిధ గ్రామాల్లో పండుగలు, ఉత్సవాల నిర్వహణకు రూ.1.50 లక్షలు వెచ్చించారు. కరోనా విపత్కర సమయంలోనూ పేదలకు భోజనం, ఆర్థిక సహాయం అందించి మానవత్వాన్ని చాటుకున్నారు.

 

సంపాదనలో కొంత సమాజం కోసమే!

 

ఎంసీఏ, ఎల్‌ఎల్‌బీ ఉన్నత విద్యను అభ్యసించిన బొమ్మన మధుమోహన్ రెడ్డి అలగనూరు రిజర్వాయర్‌లో కాంట్రాక్టరుగా పనిచేస్తున్నారు. వృత్తిపరంగా ఎంత బిజీగా ఉన్నప్పటికీ గ్రామాల అభివృద్ధి, ప్రజల సమస్యలను విస్మరించకుండా తనవంతు సహకారం అందిస్తున్నారు. నాలుగు గ్రామాల్లో సుమారు రూ.5 కోట్లతో వివిధ అభివృద్ధి, సేవా కార్యక్రమాలు చేపట్టినట్లు వివరాలు వెల్లడిస్తున్నాయి.

 

ప్రజాసేవే నిజమైన సంతృప్తి

 

‘నాకు ఉన్నదాంట్లో పది మందికి సాయం చేయాలన్నదే నా ఆశయం. నేను పుట్టిన ఊరు అభివృద్ధి చెందాలి. పేదల కళ్లల్లో ఆనందం కనిపించాలి. నిరుద్యోగ యువతకు ఉపాధి లభించాలి. గ్రామాల్లో తాగునీరు, రహదారులు, ఇతర మౌలిక సదుపాయాలు మెరుగుపడాలి. గ్రామాల అభివృద్ధికి నా వంతు సహకారం ఎప్పటికీ కొనసాగిస్తా. ప్రజలకు సేవ చేయడంలోనే నాకు నిజమైన సంతృప్తి ఉంది’ అని బొమ్మన మధుమోహన్ రెడ్డి పేర్కొంటున్నారు. స్వగ్రామానికే పరిమితం కాకుండా పొరుగున ఉన్న గ్రామాల అభివృద్ధికి సైతం చేయూతనిస్తూ సాగుతున్న ఆయన సేవా కార్యక్రమాలు స్థానికంగా చర్చనీయాంశంగా నిలుస్తున్నాయి.

RELATED ARTICLES
- Advertisment -ads

Most Popular