వ్యాపారం
-లింగారెడ్డి గజ్జల
ఇంటి అల్మారాలో దాచుకున్న ఆ బంగారు హారం… అమ్మమ్మ నుంచి అమ్మకి, అమ్మ నుంచి కూతురికి వచ్చిన పాత గాజులు… చాలామందికి అవి కేవలం ఆభరణాలు కాదు—భద్రత, నమ్మకం, అవసరమైనప్పుడు ఆదుకునే బలమైన ఆస్తి. ఇప్పుడు అదే బంగారం విలువ ఊహించని ఎత్తుకు చేరింది. ధరల ఎగసిపాటుతో భారతీయ ఇళ్లలో ఉన్న పసిడి మొత్తం విలువ దేశ జీడీపీతో పోల్చుకునే స్థాయికి వెళ్లిందంటే ఆశ్చర్యమే.
నిపుణుల అంచనాల ప్రకారం భారతీయ కుటుంబాల వద్ద దాదాపు 30 వేల టన్నులు బంగారం ఉంది. అంతర్జాతీయ ధరల ప్రకారం దీని విలువ సుమారు 5 ట్రిలియన్ డాలర్లు—భారత కరెన్సీలో చెప్పాలంటే సుమారు రూ. 452 లక్షల కోట్లకు సమానం. పోల్చి చూస్తే, IMF అంచనా వేసిన 2025–26 ఆర్థిక సంవత్సర నామమాత్రపు జీడీపీ ($4.125 ట్రిలియన్) కంటే ఎక్కువగా ఈ గృహ బంగారం విలువ ఉందని అర్థం.
ఇది ఒక్కసారిగా ఏర్పడిన సంపద కాదు. తరతరాలుగా దాచుకున్న ఆస్తి. బంగారం ధర పెరిగినప్పుడల్లా ఈ సంపద విలువ కూడా పెరుగుతుంది; ధరలు తగ్గితే విలువ తగ్గుతుంది. కానీ పరిమాణ పరంగా చూసినప్పుడు, ఇంత పెద్ద మొత్తంలో గృహ బంగారం ఉన్న దేశాలు ప్రపంచంలో అరుదు.
Gold Rates ఎందుకు ఇంత పెరిగాయి?
2025లోనే బంగారం ధరలు దాదాపు 65% వరకు ఎగబాకినట్లు మార్కెట్ అంచనాలు సూచిస్తున్నాయి. దీనికి కొన్ని ప్రధాన కారణాలు ఉన్నాయి:
- డాలర్ మరియు ప్రభుత్వ బాండ్లపై పెట్టుబడిదారుల నమ్మకం కొంత తగ్గడం
- ప్రపంచ ఆర్థిక అనిశ్చితి
- భౌగోళిక రాజకీయ ఉద్రిక్తతలు
- కేంద్ర బ్యాంకులు బంగారాన్ని మళ్లీ భద్రతా ఆస్తిగా భావించడం
పెట్టుబడిదారులు, దేశాల సెంట్రల్ బ్యాంకులు—ఇద్దరూ ఇప్పుడు బంగారాన్ని ‘సేఫ్ హేవన్’గా చూస్తున్నారు. ప్రపంచంలో పరిస్థితులు కఠినంగా మారినప్పుడల్లా బంగారం ధరలు బలపడటం ఇదే కారణం.
ఇంటి బంగారం : ఆభరణమా? ఆస్తా?
భారతీయుల జీవితంలో బంగారం ప్రత్యేక స్థానం కలిగి ఉంది. పెళ్లిళ్లు, పండుగలు, అత్యవసరాలు—ప్రతి సందర్భంలోనూ పసిడి కీలకం. కష్టకాలంలో గోల్డ్ లోన్ రూపంలో వెంటనే డబ్బు పొందే అవకాశం కూడా దీనికి ఒక కారణం.
అయితే నిపుణుల అభిప్రాయం ప్రకారం ఇంట్లో దాచిన బంగారం నేరుగా ఆదాయం ఇవ్వదు. అది వ్యాపారం లాంటిది కాదు, ఉద్యోగం లాంటిది కాదు. దేశ ఆర్థిక వృద్ధిని నడిపించదు. అయితే ఇటీవల పరిస్థితి కొంత మారుతోంది. గోల్డ్ బ్యాండ్లు, గోల్డ్ లోన్లు, డిజిటల్ గోల్డ్ వంటి మార్గాల ద్వారా ఈ బంగారం ఆర్థిక వ్యవస్థలోకి మెల్లగా ప్రవేశిస్తోంది.
గృహాల్లో ఉన్న బంగారాన్ని సక్రమంగా పెట్టుబడులుగా మలిస్తే దేశ వృద్ధికి మద్దతు లభించేలా ఆర్థిక నిపుణులు సూచిస్తున్నారు.
గృహాలకే కాదు… ఆర్బీఐకూ బంగారం ప్రాధాన్యత
బంగారంపై ఆసక్తి కేవలం ప్రజలకే పరిమితం కాదు. రిజర్వ్ బ్యాంక్ ఆఫ్ ఇండియా (RBI) కూడా గత పదేళ్లలో తన బంగారం నిల్వలను పెంచుకుంది. సుమారు 58% వరకు వృద్ధి నమోదైంది. ప్రస్తుతం భారత్ వద్ద దాదాపు 880 టన్నుల బంగారం ఉంది. దేశ విదేశీ మారక నిల్వల్లో బంగారం వాటా 17%కు పైగా పెరిగింది.
ప్రపంచవ్యాప్తంగా సెంట్రల్ బ్యాంకులు ప్రతి ఏడాది భారీగా బంగారం కొనుగోలు చేస్తున్నారు. కారణం స్పష్టమే.. కరెన్సీ అస్థిరత, ఆంక్షల భయం, డాలర్పై ఆధారపడే పరిస్థితిని తగ్గించుకోవాలనే ప్రయత్నం.
విదేశీ మారక నిల్వల్లో కొత్త రికార్డు
జనవరి 23తో ముగిసిన వారంలో భారత విదేశీ మారక నిల్వలు $709.413 బిలియన్లకు చేరాయి— ఇది కొత్త స్థాయి స్థాయి. ఒకే వారంలో $8 బిలియన్లకు పైగా వృద్ధి నమోదైంది. విదేశీ కరెన్సీ ఆస్తులు (FCAలు) పెరగడం, బంగారం నిల్వలు $123 బిలియన్లకు చేరడం ఈ వృద్ధికి కారణమయ్యాయి.
ఇంతకుముందు రూపాయి అస్థిరత కారణంగా నిల్వలు కొంత ఒత్తిడికి అవసరమవుతాయి. కానీ తాజాగా స్థిరత్వం తిరిగి వస్తోందని సూచిస్తున్నాయి.
లాభం కోసం కాదు… భద్రత కోసం
ఈ రోజుల్లో బంగారం కొనుగోలు ప్రధానంగా లాభం కాదని, భద్రత కోసం నిపుణులు చెబుతున్నారు. వడ్డీ లేకపోయినా, రాబడి నిర్దిష్టంగా లేకపోయినా.. అత్యవసర సమయంలో అమ్ముకునే, ఎవరిపైనా ఆధారపడాల్సిన అవసరం లేని ఆస్తిగా బంగారం నిలుస్తుంది.
కరెన్సీ విలువ పడిపోయినప్పుడు, ఆర్థిక సంక్షోభం ఉన్నప్పుడు బంగారం రక్షణ కవచంలా పనిచేస్తుంది. అందుకే గృహాలైనా, కేంద్ర బ్యాంకులైనా.. ఇద్దరికీ బంగారం ఒక రకంగా “భద్రతా బీమా”గా మారింది.
ఇంటి అల్మారాలో ఉన్న ఆ బంగారు ఆభరణాలు కేవలం సంప్రదాయం కాదు—అవి ఇప్పుడు ఆర్థిక శక్తిగా మారాయి. ఆ విధంగా సరైన వినియోగిస్తే వ్యక్తిగత భద్రత కాదు, దేశ ఆర్థిక వ్యవస్థకూ మద్దతు ఇవ్వగల సామర్థ్యం వాటిలో ఉంది. పసిడి మీద భారతీయుల ప్రేమ పాతదే… కానీ దాని ఆర్థిక ప్రాధాన్యత ఇప్పుడు కొత్త అర్థం పొందుతోంది.
