ఎమ్మెల్యే కె.ఈ. శ్యాంకుమార్ సహకారంతో దశలవారీగా అభివృద్ధి కార్యక్రమాలు
మౌలిక వసతుల సమస్యల పరిష్కారమే లక్ష్యం
ఎన్నారై అనిల్ కుమార్ గౌడ్
వెల్దుర్తి, జూలై 17, (సీమకిరణం న్యూస్):
కర్నూలు జిల్లా వెల్దుర్తి మండల కేంద్రాన్ని అన్ని రంగాల్లో అభివృద్ధి చేసి, జిల్లాలోనే ఒక ఆదర్శ గ్రామంగా తీర్చిదిద్దడమే తన ప్రధాన లక్ష్యమని ఎన్నారై అనిల్ కుమార్ గౌడ్ స్పష్టం చేశారు. పత్తికొండ ఎమ్మెల్యే కె.ఈ. శ్యాంకుమార్ ప్రోత్సాహం, సహకారంతో గ్రామాభివృద్ధికి అవసరమైన అన్ని రకాల సంక్షేమ, అభివృద్ధి కార్యక్రమాలను దశలవారీగా అమలు చేస్తామని ఆయన పేర్కొన్నారు. తాజాగా వెల్దుర్తిలో పర్యటించిన ఆయన, గ్రామంలోని పలు సమస్యలను పరిశీలించారు. ఈ సందర్భంగా అనిల్ కుమార్ గౌడ్ మాట్లాడుతూ గ్రామంలో దీర్ఘకాలంగా వేధిస్తున్న తాగునీటి సరఫరా లోపం, అస్తవ్యస్తంగా మారిన డ్రైనేజీ వ్యవస్థ, దెబ్బతిన్న రహదారులు, తీవ్ర ట్రాఫిక్ ఇబ్బందులు మరియు పారిశుద్ధ్య లోపాలను గుర్తించినట్లు తెలిపారు. ఈ మౌలిక వసతుల సమస్యలన్నింటికీ శాశ్వత పరిష్కారం చూపేలా ఒక ప్రత్యేక కార్యాచరణ ప్రణాళికను రూపొందిస్తున్నట్లు వెల్లడించారు. స్థానిక ప్రజల సహకారం, ప్రభుత్వ అధికారుల సమన్వయంతో అభివృద్ధి పనులను మరింత వేగవంతం చేస్తామని, వెల్దుర్తిని ఇతర గ్రామాలకు ఒక రోల్ మోడల్గా నిలిపేందుకు శ్రమిస్తామని చెప్పారు. గ్రామాభివృద్ధి అనేది కేవలం ఒకరిద్దరితో సాధ్యం కాదని, ప్రజల భాగస్వామ్యం ఎంతో అవసరమని ఆయన అభిప్రాయపడ్డారు. ప్రతి ఒక్కరూ బాధ్యతతో ముందుకు వస్తే వెల్దుర్తి అన్ని రంగాల్లో అగ్రగామిగా నిలుస్తుందని అనిల్ కుమార్ గౌడ్ ఆశాభావం వ్యక్తం చేశారు. గ్రామ ప్రజల ఆకాంక్షలకు అనుగుణంగా, మౌలిక సదుపాయాల కల్పనకు ప్రథమ ప్రాధాన్యత ఇస్తూ అభివృద్ధి పనులను త్వరలోనే పట్టాలెక్కిస్తామని ఆయన హామీ ఇచ్చారు.