భారతదేశం
-కొరివి జయకుమార్
ప్రపంచ ఇంధనం, షిప్పింగ్ మార్కెట్లో మార్పులు చోటుచేసుకుంటున్నాయి. రష్యా-ఉక్రెయిన్ యుద్ధం, పాశ్చాత్య దేశాల ఆంక్షలు కొనసాగుతున్నప్పటికీ.. రష్యా ముడి చమురుకు ఆసియా దేశాల్లో డిమాండ్ తగ్గడం లేదు. ముఖ్యంగా భారతదేశం తన దిగుమతులను భారీగా పెంచడం వల్ల ఈ సమీకరణలో కీలక మార్పు ప్రారంభమైంది. ఇప్పటివరకు రష్యా చమురు దిగుమతుల్లో ఆధిపత్యం చెలాయించిన చైనాకు ఇప్పుడు భారత్ గట్టి పోటీగా నిలుస్తోంది.
చైనా నుంచి భారత్ వైపు మళ్లిన ట్యాంకర్లు..
బ్లూమ్బెర్గ్ నివేదికల ప్రకారం, రష్యా నుంచి చైనాకు వెళ్లాల్సిన భారీ ఆయిల్ ట్యాంకర్లు మార్గమధ్యంలో తమ దిశ మార్చుకుని భారత్ వైపు మళ్లాయి. దక్షిణ చైనా సముద్రంలో యు-టర్న్ తీసుకుని భారత పోర్టులకు చేరుకోవడం ప్రపంచ షిప్పింగ్ రంగంలో చర్చనీయాంశమైంది.షిప్ ట్రాకింగ్ డేటా ప్రకారం బాల్టిక్ సముద్రం నుంచి చైనాలోని రిజావో పోర్టుకు వెళ్లాల్సిన ఓ నౌక మార్గం మార్చుకుని కర్ణాటకలోని మంగళూరు పోర్టుకు చేరనుంది. ఇదే విధంగా ట్యాంకర్లు కూడా తమ గమ్యాన్ని మార్చుకున్నాయి.
భారీగా పెరిగిన భారత కొనుగోళ్లు..
అమెరికా తాత్కాలిక అనుమతి ఇచ్చిన నేపథ్యంలో, భారత్ రష్యా నుంచి చమురు దిగుమతులను వేగంగా పెంచింది. కేవలం వారంలో దాదాపు 30 మిలియన్ బారెళ్ల ముడిచమురు కొనుగోలు చేయడం భారత చరిత్రలోనే పెద్ద డీల్గా నిలిచింది. Vortexa Ltd ప్రకారం.. కనీసం ఏడు భారీ ట్యాంకర్లు చైనాకు బదులు భారత్కు తమ సరఫరాను మళ్లించాయి. ఇది అంతర్జాతీయంగా డిమాండ్ దిశ ఎలా మారుతుందో తెలియజేస్తోంది.
‘Suezmax Zhuzhu N’ వంటి భారీ ట్యాంకర్లు కూడా తమ మార్గాన్ని మార్చుకుని భారత పోర్టులకు చేరాయి. గుజరాత్లోని సిక్కా పోర్టుకు చేరనున్న ఈ నౌకలో కజకిస్తాన్ నుంచి వచ్చిన CPC బ్లెండ్ ముడిచమురు కావడం విశేషం. ఈ మార్పులు కేవలం ఒక్కో నౌకకు పరిమితం కాకుండా, సమగ్రంగా షిప్పింగ్ రూట్లలో మార్పులకు దారి తీస్తున్నాయి.
మధ్యప్రాచ్య ఉద్రిక్తతల ప్రభావం..
మధ్యప్రాచ్యంలో పెరుగుతున్న ఉద్రిక్తతలు, ముఖ్యంగా ఇరాన్ భద్రతా ఆందోళనలు ప్రపంచ ఇంధన సరఫరాపై ప్రభావం చూపుతున్నాయి. ఈ నేపథ్యంలో భారత్, రష్యాను స్థిరమైన సరఫరా భాగస్వామిగా చూస్తోంది. అంతర్జాతీయ రాజకీయ పరిస్థితులు మారుతున్న వేళ, ఇంధన భద్రత కోసం భారత్ ముందస్తు చర్యలు తీసుకుంటోందని నిపుణులు.
ఇప్పటివరకు రష్యా చమురు ప్రధానంగా చైనా మార్కెట్పై ఆధారపడగా, ఇప్పుడు భారత్ కీలక కొనుగోలుదారుగా ఎదుగుతోంది. ఇదే సమయంలో జపాన్, దక్షిణ కొరియా వంటి దేశాలు కూడా రష్యా చమురు కొనుగోళ్లను పునఃప్రారంభించేందుకు ఆసక్తి చూపుతున్నాయి. దీంతో ఆసియా మార్కెట్లో పోటీ పెరిగి, భవిష్యత్తులో ధరలు పెరిగే అవకాశం ఉందని విశ్లేషకులు అంచనా వేస్తున్నారు.
భారత్కు వ్యూహాత్మక లాభాలు..
భారత్ ఈ కొనుగోళ్ల ద్వారా తక్కువ ధరకు ముడి చమురు పొందడమే కాకుండా, దేశీయ ఇంధన నిల్వలను వృద్ధి చేసుకుంటోంది. అలాగే రిఫైనరీ రంగంలో కూడా భారత్ తన ఆసక్తిని పెంచుకుంటోంది. ఇది దీర్ఘకాలంలో ఇంధన దిగుమతులపై ఖర్చును తగ్గించడమే కాకుండా, దేశ ఆర్థిక స్థిరత్వానికి తోడ్పడే అవకాశం ఉంది.
గ్లోబల్ పవర్గా భారత్..
చైనాకు వెళ్లాల్సిన ట్యాంకర్లు భారత్కు మళ్లడం ఒక సంకేతంగా ఉంది. ఇది ఆసియాలో భారత్ పెరుగుతున్న ప్రభావం, అంతర్జాతీయ వాణిజ్యంలో దాని పాత్రను స్పష్టంగా చూపుతోంది. పాశ్చాత్య దేశాల ఒత్తిళ్లు అనుకూలంగా, దేశ ప్రయోజనాలను దృష్టిలో పెట్టుకుని భారత్ తీసుకుంటున్న నిర్ణయాలు ప్రపంచ దృష్టిని ఆకర్షిస్తున్నాయి. ఇంధన రంగంలో స్వయం సమృద్ధి దిశగా ఇది ఒక కీలక అడుగుగా నిపుణులు అభిప్రాయపడుతున్నారు.
